രാജ്യത്തെ ഹോട്ടൽ-റസ്റ്ററന്റ് മേഖലയ്ക്ക് ആശ്വാസം പകർന്ന്, പുതുവത്സര ദിനത്തിൽ വാണിജ്യ എൽ.പി.ജി സിലിണ്ടറുകളുടെ വില കുറച്ചു. 19 കിലോഗ്രാം സിലിണ്ടറിന് 14.50 രൂപയാണ് കുറച്ചിരിക്കുന്നത്. പുതിയ നിരക്കുകൾ പ്രകാരം ഡൽഹിയിൽ ഒരു സിലിണ്ടറിന് 1,804 രൂപയാണ് വില. പുതിയ നിരക്കുകൾ ഇന്ന്, ജനുവരി 1 മുതൽ പ്രാബല്യത്തിൽ വന്നു. അതേ സമയം 14.2 കിലോഗ്രാം സിലിണ്ടറുകളുടെ വിലയിലും, ഗാർഹിക എൽ.പി.ജി വിലയിലും മാറ്റങ്ങളില്ല.
തുടർച്ചയായ അഞ്ച് മാസങ്ങളിലെ വില വർധനവിന് ശേഷമാണ് ഇപ്പോൾ വാണിജ്യ സിലിണ്ടറുകളുടെ വിലയിൽ കുറവ് വരുത്തിയിരിക്കുന്നത്. 2024 ആഗസ്റ്റ് മുതൽ ഇത്തരത്തിൽ 172.50 രൂപയാണ് എൽ.പി.ജി വില വർധിച്ചത്. ഇക്കാലയളവിൽ ഗാർഹിക പാചക വാതക സിലിണ്ടറുകളുടെ വിലയിൽ മാറ്റമുണ്ടായിട്ടില്ല. ഇതിനാൽ നിലവിൽ വാണിജ്യ സിലിണ്ടറിന്റെ വില കുറച്ചത് ഹോട്ടൽ-റസ്റ്ററന്റ് ബിസിനസുകൾക്ക് ആശ്വാസം പകരുന്ന നടപടിയാണ്.
എൽ.പി.ജിക്ക് പുറമെ ഏവിയേഷൻ ടർബൈൻ ഫ്യുവലിന്റെ വില 1.54% കുറച്ച് കിലോ ലിറ്ററിന് 1,401.37 രൂപയാണ് കുറവ് വന്നിരിക്കുന്നത്. നിലവിൽ ഡൽഹിയിൽ ഒരു കിലോ ലിറ്റർ ഏവിയേഷൻ ഫ്യുവലിന് 90,455.47 രൂപയാണ് വില. എല്ലാ മാസവും രാജ്യത്തെ എണ്ണക്കമ്പനികൾ പാചക വാതകത്തിന്റെ വില പുതുക്കി നിശ്ചയിക്കാറുണ്ട്. ആഗോള വിപണിയിലെ ഗതിവിഗതികൾക്ക് അനുസൃതമായിട്ടാണ് ഇവിടെയും വിലയിൽ മാറ്റം നടപ്പാക്കുന്നത്. ഇത് കൂടാതെ വിനിമയ നിരക്കുകളിലെ മാറ്റവും വിലയിൽ പ്രതിഫലിക്കുന്നു.
നിലവിൽ എൽ.പി.ജി സിലിണ്ടറുകളുമായി ബന്ധപ്പെട്ട് എണ്ണക്കമ്പനികൾ നഷ്ടം നേരിടുന്നതായി റിപ്പോർട്ടുകളുണ്ട്. പൊതുമേഖലാ എണ്ണക്കമ്പനികളായ ഐ.ഒ.സി.എൽ, ബി.പി.സി.എൽ, എച്ച്.പി.സി.എൽ എന്നിവയുടെ നടപ്പു സാമ്പത്തിക വർഷത്തിലെ ആദ്യ പകുതിയിലെ റിസൾട്ടുകൾ ആശാവഹമല്ലെന്ന് ഐ.സി.ഐ.സി.ഐ റിപ്പോർട്ടിൽ പറയുന്നു. എൽ.പി.ജി സംബന്ധിച്ച നഷ്ടം, ഇൻവെന്ററി നഷ്ടം തുടങ്ങിയ, തൊട്ടു മുമ്പത്തെ വർഷത്തെ സമാന കാലയളവിനേക്കാൾ മോശം പ്രകടനത്തിന് കാരണമായതായും റിപ്പോർട്ടിൽ പരാമർശമുണ്ട്.
2025 ഫെബ്രുവരി 1ാം തിയ്യതി അവതരിപ്പിക്കുന്ന കേന്ദ്ര ബജറ്റിൽ പെട്രോളിയം ഉല്പന്നങ്ങളുടെ നികുതിയിൽ ഇളവ് വരുത്തുമെന്ന പ്രതീക്ഷ നില നിൽക്കുന്നു. കഴിഞ്ഞ ദിവസം പെട്രോളിയം ഉല്പന്നങ്ങളുടെ എക്സൈസ് ഡ്യൂട്ടിയിൽ കുറവ് വരുത്തണമെന്ന് കോൺഫെഡറേഷൻ ഓഫ് ഇന്ത്യൻ ഇൻഡസ്ട്രീസ് കേന്ദ്രസർക്കാരിനോട് ആവശ്യപ്പെട്ടിരുന്നു. ഇതിൽ അനുകൂല നടപടിയുണ്ടാകുമെന്നാണ് കരുതുന്നത്.
